تجربتي في السنة الأولى - تخصص التمريض.

 

بسم الله الرحمن الرحيم 

سَبيلُ العُلا عَالٍ على مَن تَعَلـلا 

‏ومَن جَدّ في سَعيٍ لأمرٍ تَمَـكنا 

‏رأيْتُ الثُـريا رُؤيةَ النَجم للثّـرى 

‏وذاكّ لأن الصّعبَ مَا زَالَ مُمكِنا

أهلاً وسهلاً بكم أعزائي الُقراء وزُملاء المهنة! ، مبارك قبولكم واسأل الله أن يجعله برداً وسلاماً عليكم .. أنا سارة وراح أشارركم ( تجربتي الشخصية ) في السنة الأولى من تخصص التمريض من حيث : نظام الكلية ، المواد وأخيراً اسئلتكم نهاية المدونة .

وقبل لا ابدأ حابه أنوه فقط : أن هذه مجرد تجربة شخصية وأجتهاد شخصي بحّت والغرض من نشرها أن تعم الفائدة - بإذن الله - وإتاخذها مصدراً ملهم  لطريق البعض منكم،اسأل الله لي و لكم التوفيق والنجاح في خطواتكم المقبلة .. 

أولاً : نظام الكلية  : 

تخصص التمريض - جامعة القصيم.

الدراسة ٥ سنوات ( سنة تحضيرية ، ٣ سنوات تخصص و السنة الرابعة ميدانيه بأحد المستشفيات ( الامتياز ) "

وبرنامج البكالوريوس  ( تخصص التمريض ) يتبع نظام PBL

(Problem based learning )  ( حل المشكلات ) في مناهجها الدراسية المطروحة وطبعاً المناهج مدموجة بين العلوم الطبية الأساسية ( بلوكات من كلية الطب) وعلوم التمريض ، و البرنامج يغطي التمريض بمناهجه المطروحة من أربع تخصصات : تمريض الباطني والجراحي ، التعليم التمريضي ، تمريض صحة عقلية ونفسية وصحة مجتمع ، وتمريض صحة الأم والطفل . 

وراح اتطرق لنظام  - بإذن الله - بالتفصيل لما اتكلم عن المواد . 

ملاحظة :  الكلية نظامها أيضاً ( سنوي ) بمعنى : أن معدل الترم الأول ومعدل الترم الثاني راح يظهر لكم ( كمجموع ) نهاية السنة الدراسية . 

لذلك أنتبهوا من ناحية ( الإعتذار والتأجيل ) - لاسمح الله - لإنه راح تنتظرون سنه كاملة وراح تبدون مع الدفعه الجديدة. 

ثانياً : المواد : 

السنة الأولى راح تدرسون الترم الأول ٥ مواد والترم الثاني ٥ مواد  وكلها بمعدل ٣٧ ساعة ( كل الترمين)

تنوية : كل المواد فيها جزء نظري وجزء عملي ماعدا طبعاً المواد الحُرة . 

 ⁃ الترم الأول : 

بلوك ( تكوين جسم الإنسان ووظائفه ) : ٨ ساعات

التعليم التمريضي : ٣ ساعات

المفاهيم الأساسية لرعاية التمريضية : ٣ ساعات

المهارات اللغوية ( عرب ١٠١) : ساعتين

مدخل الثقافة الاسلامية ( سلم ١٠١ ) : ساعتين 

 - الترم الثاني:

تمريض البالغين ١ : ٧ ساعات 

بلوك ( النمو والتطور للتمريض ) : ٦ ساعات 

بلوك ( الفسيولوجية المرضية ) : ساعتين

التقييم الصحي في الممارسة الإكلينيكية : ساعتين

الإسلام وبناء المجتمع ( سلم ١٠٢ ) : ساعتين

تكوين جسم الإنسان ووظائفه ( Body structure and function ) : 

بالبداية هو بلوك ويتكون من ٤ مواد :  علم وظائف الاعضاء ( physiology) ، علم الأنسجة (  histology ) ، علم الادوية( pharmacology ) ، علم التشريح ( Anatomy ) عليه ٨ ساعات بالمعدل فيه نظري وعملي وكويزز .. 

ومثل ماذكرت سابقاً البلوك راح يتم إعطاءه من قبل كلية الطب وإيضاً الاختبارات والتصحيح كذلك.

إيش محتوى البلوك؟ راح تدرسون عن أجهزة الجسم بالتفصيل مثل الجهاز الهضمي والدوري .. الخ . يعني مشابهه لمادة البايولوجي. 

*طيب كيف ياسارة راح نأخذ الجهاز المعين بكل المواد؟* 

مثلاً : الجهاز الدوري : 

أولاً : الهستولوجي راح تاخذون تكوينه من ناحية تكوين الخلايا والانسجة التابعه للجهاز 

الأناتومي : راح تاخذون تكوين الجهاز نفسه يعني الجهاز الدوري يتكون من القلب و الأوعية الدموية واتجاهات وهكذا  ويكون فيه تفصيل طبعاً لكن اشرح الفكرة

الفسيولوجي : راح تاخذون وظيفة العضو او الجهاز نفسه وإيش يقوم بالضبط بالجسم

*وراح يكون له محاضرات منفصلة وخاصة للجزء العملي فقط *

الفارما : راح تاخذون الأدوية انواعها وأيش آلية عمل الدواء ، وايش الأعراض الجانبيه وأيش دور الجسم ناحيتها بالضبط . 

مواد البلوك مكمّلة لبعض يعني راح تاخذون كل جهاز بالجسم بالتفصيل .. وطبعاً محتوى المحاضرات راح يكون ( سلايدز ) من الدكتورة نفسها ترسله لكم .

محتوى المحاضرات مختلف فيه البسيط وفيه الدسم وكله يعتمد على الدكتورة نفسها .. لكن مجملاً مااقولكم أنه صعب لا ابداً اذا تقبلتوا المادة وماحسيتوا أنها فرض راح تبدعون! 

المعدل يعتمد كثير على البلوك يعني شدوا حيلكم وراجعوا أول بأول ، الاختبارات راح تجي من الدكاترة اللي تشرح لكم يعني ركزوا على شرحهم وعلى الاسئلة اللي يذكرونها بالشرح وأيضاً على النوت اللي يذكرونها

ويعتمد على الفهم والحفظ مو حفظ وبس! 

ولاتتهاونون أبداً نصيحة ولاتجمعون المحاضرات عليكم حتى لو كانت المحاضرات محتواها قليل راح تنضغطون وقت المذاكرة! . 

*المادة فيها نظري وعملي وكويز مثل ماذكرت  .. والعملي فقط لمادتين ( الاناتومي والفسيولوجي )* 

 ⁃ الجزء  العملي : 

الأناتومي : راح يكون اختبار عملي واحد - نهائي - وراح تختبرونه قبل الاختبارات النظرية .

طريقته : الدكتورة راح تحدد لكم صور معينه وترسلها لكم بملف وانتم تذاكرون الصور .. وبالإختبار راح تجيب نفس الصورة وعليها سهم تحدد منطقه معينه وتقول لك اذكري المنطقة هذي او إيش اسمه .

الفسيولوجي : اختبار عملي واحد  - نهائي - وأيضاً تختبرونه قبل الاختبارات النظرية . 

تذاكرون محاضرات العملي فقط والاختبار ورقي بيكون . 

يعني تقدرون تقولون نظري عملي 😅.

⁃ المفاهيم الأساسية لرعاية التمريضية (basic concept for Nursing care ) : 

مادة تخصص ..  وهي الأساس والقاعدة لمفاهيمكم لباقي السنوات الاخرى .. وتعتبر نقطة اساسية حتى تدرسون باقي المواد مثل تمريض البالغين ( الترم الثاني تدرسونه) وباقي المواد الاخرى .. 

*لتوضيح فقط : يعني لازم تجتازون هذي المادة حتى تجتازون البقية ماينفع تحذفون او تأجلون لانه يأثر على بعض * 

المادة لها جزء عملي وجزء نظري وكويز و PBL ( المادة الوحيدة اللي فيها PBL)

الجزء النظري : 

تدرسون عدة مواضيع مهمة .. مثل : electrolytes of body  ( sodium , chloride , potassium . ( الخ .. ، ( ولتوضيح : مثلاً شخص عنده الصوديوم قليل بالجسم ايش مسمى حالته طبياً؟ ايش اعراضه وكيف اقدر اعالجه ودوري كممرضه ناحيته؟ .. وهكذا .. يتكلم عن احتياجات الانسان ، الالم وانواعه ومسبباته وطرق علاجه .. الضغوطات ، الارهاق .. وغيرها من المواضيع الاساسية .. 

PBL :  راح يكون مرة بالاسبوع تقريباً وعبارة عن سيناريو فيه مشكلة او مرض معين ، راح تكونون متوزعين على عدة مجموعات مستمرة لنهاية الترم ( تقسيمها بناء على الدكتورات ) وراح يطلب منكم كمجموعات انكم تقرون السيناريو وتطلعون المهم وتتناقشون بينكم ومع الدكتورة وتسوون خرائط مفاهيم عشان تجمعون النقاط المهمة حتى تستخرجون منه عنوان السيناريو + اوبجكتف او نقاط مطلوبه منكم تبحثون عنه و راح تناقشونها الجلسة الجاية .. عليه ٥ درجات حاولوا تحضرون وماتتأخرون لانه يحسب  لكم الالتزام + التفاعل + التأخير .. 

( تنويه : الـ PBL ينقسم لجلستين ( جلسة تاخذون السيناريو وتطلعون الاوبجكتف + الجلسة الثانيه راح تكون الاسبوع اللي بعده معكم المعلومات اللي بحثتوا عنها بناء على الاوبجكتف + تاخذون سيناريو جديد وهكذا )

الجزء العملي ( لاب ) : 

راح تاخذون عدة مواضيع تطبيقية ( procedures ) مو مرتبطة كلياً بالنظري .. مثل قياس العلامات الحيوية ( الضغط ،النبض والتنفس وغيره ) وايضاً الادوية وانواعه وطُرق استعماله .. والأبر وانواعها ومتى يتم اعطاءها للمريض( وهذا اهم شي ) 

الاختبار العملي : اختبار واحد - نهائي - ومجدول مع باقي الاختبارات العملية

وراح يكون قبلها اعلامكم من قبل الاستاذات عن المواضيع او ( البروسيجرز) اللي تذاكرونه وتجي للاختبار

والمطلوب منكم انكم ( تفهمون الطريقة وتاخذونه مبدأ أنكم لو بالمستشفى راح تسوون هالبروسيجرز ) ف اتقنوها من هالمبدأ قبل مبدأ الدرجات وغيره 

وراح يكون الاختبار زي القُرعة ( بمعنى انه اسماء البروسيجرز مذكورة بورق وانتي تسحبين وحظك نصيبك 😂) راح يطلع لك 2 بروسجيرز وتطبقينها طبعاً بحذافيرها عند الاستاذة ..

⁃ التعليم التمريضي ( Nursing education )

مادة تخصص أيضاً .. لها عملي ( جزئين )  ونظري وكويز .. وباختصار المادة كأنها ( ميديو ) يعني راح تاخذون عدة مواضيع مثل : PBL , role of tutor , الفرق بين التعليم التقليدي و SDL  التعليم الذاتي ، ومواضيع أخرى مثل : Objective, action , media .. الخ

*طبعاً مواضيع المحاضرات ومحتواها مرتبط كلياً بالجزء العملي الخاص بالمادة* .. 

الجزء العملي: 

راح يكون مطلوب اختيار موضوع وعمل مشروع ( وحدة او مادة تعليميه على شكل مجلة ) وتشتغلون عليه طيلة الترم .. وراح يتم تقسيمكم كمجموعات مستمرة لنهاية الترم بناءً على الدكتورات .. كل مجموعه معها دكتورة تشرف عليكم وعلى مشروعكم وتكون معكم اول بأول وتشوف تعديلاتكم للمجلة ، وراح تجتمع معاكم كل مرة بالاسبوع لين نهاية الترم 

( اليونت او المادة التعليميه راح تكون بنسختين نسخة مكتوب باللغة الانجليزية ونسخة باللغة العربية ) والترجمه للعربية يكون مطلوب اخر شي طبعاً عقب ماتنتهون من اليونت بالكامل .. 

( طيب للحين مافهمت كيف مواضيع المحاضرات لها دخل باليونت هذي ؟ ) 

اليونت محتواها وطريقة عمله راح يتم ذكره بالمحاضرات وراح تبلغكم الدكتورة وقت المحاضرة كيف تطبقون المحاضرة عملياً باليونت تبعكم ) 

تنبيه : اليونت عليها ٢٠ درجة وكيف يتم تقييمكم واعطاءكم الدرجة ؟ 

بعد ماتنتهون من اليونت راح تحددون يوم لعرض المشاريع وتسوون ركن متكامل يتكلم عن الموضوع اللي اخترتوه  لليونت وراح تعرضون اليونت بالركن نفسه وتشرحون ) 

الجزء الثاني من الاختبار العملي : 

اختبار نهائي  ايضاً مجدول مع الاختبارات العملية الباقية .. 

طريقته : اختبار ورقي "فردي"محتواه سيناريو ( زي طريقة الـ PBL باختصار ) السيناريو تقرونه ويطلب منكم تطلعون ( العنوان + تسوون خريطة مفاهيم + اوبجكتف )  وعليه ٥ درجات

 ⁃ هل ممكن ان عنوان السيناريو سبق وانذكر بالسيناريوز اللي اخذناها ؟ او يكون احد عناوين محاضرات مقرر البيسك كونسبت؟ 

ممكن وممكن لا فالاوراق اللي تاخذونها وقت جلسات الPBL احتفظوا فيها كعلم اولاً وممكن تنذكر بالاختبار ثانياً ... 

 ⁃ عرب ١٠١ : 

احد المواد الحُرة .. راح تختبرون شهري ونهائي وكويز  .. وجداً بسيطة وسهله وراح تاخذون مواضيع مبسطة جداً مثل : النعت، المفعول به ، المفعول المطلق ، إن واخواتها .. الخ 

مادة ترفع المعدل بالساهل ، شدوا حيلكم ..

 ⁃ سلم ١٠١ ( مدخل الى الثقافة الاسلامية ) :

مادة حُرة ، راح تاخذونها ( عن بُعد) تتكلم عن الثقافة الاسلامية وتعاريفها واثارها ومصادرها .. الخ .

محتواها يكون اما شرائح عرض بوربوينت ( سلايدز ) او كتاب 

وأفضل انكم تتبعون الكتاب وقت المذاكرة نصيحة ، لان السلايدز غالباً مايذكر التفاصيل .. 

راح يتطلب منكم نهاية كل وحدة حل الانشطة والواجبات .. حاولوا تسلمونها أول بأول .. 

 ⁃ وبكذا أكون انتهيت من سرد جميع مواد الترم الأول .. الحمدالله على التّمام وراح يكون هناك مدونة " منفصلة" تتكلم عن مواد الترم الثاني بإذن الله ..  -

________________________

 ⁃ قبل الختام ، راح اجاوب على أبرز الاسئلة :

١- هل السكراب مسموح ألبسه ؟ 

السكراب حالياً ممنوع لكن وقت العملي يسمح به بشرط انك تكونين لابسه اللاب كوت فوقه .. 

٢- كيف محتوى المحاضرات وهل فيه مراجع ادرسها او كتب مطلوبه مننا وتدخل بالاختبار ؟ 

محتوى المحاضرات زي ماذكرت ( سلايدز ) وتكون من الدكتورة نفسها ترسلها لكم وممكن تعدل عليها فتابعوا معها ، بالنسبة للمراجع فـ هي زيادة علم ومو مطلوبة بالاختبار سوا السلايدز فقط .. 

٣- انا لغتي مازالت ضعيفه نوعاً ما هل بيأثر على مستواي دراسياً؟ 

الدكاترة راح يشرحون عربي ، ماعدا بعض الاستاذات وقت العملي بيشرحون انقليزي ( لانهم من الجنسيه الفلبينيه) لكن لهجتهم واضحة وعموماً مع المذاكرة وتكرار بعض الكلمات راح تفهمونها راح تثبت ببالكم وبتقوى لغتكم مع الايام لاتتأزمون من هالشيء تطمنوا ❤️. 

٤- أيش أفضل طريقة بنظرك أدرس المحاضرات من الايباد او اطبعها ؟ 

يختلف من شخص لشخص شوفوا إيش يناسبكم انتم وطبقوا ❤️. 

٥- تكلمي عن طاقم الكلية : 

الطاقم يتكون من دكتورات ( من الجنسية المصرية ) مسؤولات عن شرح المحاضرات واعطاءكم اياها وأيضاً ممكن تكون معاك كمشرفة اكاديمية تتابعك لين ماتتخرجين ، وايضاً يتكون من استاذات او معيدات ( من الجنسية السعودية والفلبينيه ) وراح يكونون معاكم بالعملي وممكن برضو يكونون معاكم كمشرفات اكاديميات .. 

وعموماً الطاقم كله كويسين وفيهم الخير والبركة ويساعدون ومايقصرون معاكم ويسمعون لكم ، لاتشيلون هم فعلاً راح تكونون بين طاقم نخبة وقمة بالعلم والتعامل .. 

٦- هل فيه أوف رسمي من الكلية ؟ وكيف طريقة الجداول؟ 

الأوف رسمياً مافيه الا في حالة وحدة ( اذا خلصتوا من مقرر بدري او بلوك وكان عندكم طيلة اليوم فـ ممكن تاخذون أوف ) وهذا غالباً يصير نهاية الترم ..

والجداول تنزل جاهزة من الكلية نفسها مافيه لاتعديل ولا اضافة فيها ..

٧ - لو حذفت مادة من الترم الاول اقدر اخذها الترم الثاني ؟ 

سبق وذكرت نظام الكلية سنوي بمعنى لو حذفتي مادة الترم الاول تضطرين تنتظرين السنه الجاية وتدرسينها مع الدفعه الجديدة .. وزيادة على كذا لو حذفتي مادة راح يتأثر بخطتك باقي السنوات

مثلاً : حذفتي مقرر البيسك كونسبت ، تضطرين تحذفين تمريض البالغين الترم الثاني .. ليه؟ لانه لازم تدرسين البيسك وتجتازينه حتى تدرسين مادة بالغين .. 

وكذلك الوضع يطبق على البلوك لو حذفتي بلوك تضطرين تحذفين بلوك الترم الثاني لانه لازم تجتازين الاول

عشان كذا نصيحة حاولوا تشدون حيلكم  ولاتحذفون مواد حتى ماتتعثرون بخطتكم الدراسية . 

٨- كيف طريقة اسئلة الاختبارات هل موحدة او لها نماذج مختلفة مثل التحضيري؟ 

الاختبارات نموذج واحد ويتم كتابته وتوزيعه وتصحيحه من الدكتورة المادة نفسها .. واسئلة الاختبار متنوعه ( اختياري وصح وخطا ومقالي وصلي بالجدول ) .. كل شيء 

انتبهوا كويس مع الدكتورة لانه بعض الاحيان تذكر طريقة السؤال بنقطة معينه ف اكتبوا الاسئلة اللي تذكرها لانه وارد جداً انه يجي بالاختبار وايضاً النوت اللي تذكره بالشرح مهم جدًا جدًا ..

٩- متى راح ننزل للمستشفى ؟ وهل فيه تحاليل معينه يطلبونها قبل؟ 

راح تنزلون الترم الثاني بمادة ( تمريض البالغين١) وراح يكون فيه تحاليل قبلها وكم عدد التطعيمات المطلوبة منكم .. 

١٠- كم عدد جلسات الـ PBL ؟ ومطلوب بكل مادة؟ 

غالباً ماراح يزيد عن ١٠ جلسات على حد علمي، ويعتمد على عدد السيناريوز اللي بتاخذونه، وكل ترم  فقط مادة وحدة  تكون درجاتها موزعه على الـ PBL . 

 

١١-  نصيحتك لطالبات المستجدات بالتخصص ؟ 

ذاكروا أول بأول ( التحضيري ونظام المنافسة انتهى ) انتم تخصصتوا ، ومبدأ المذاكرة لانكم راح تنزلون ميداني وتواجهون مرضى وتخالطون بيئة تتطلب علم ونباهه وملاحظة قوية .. خذوا مبدأ الدراسة والمذاكرة لأجل هالمبدأ اولاً وانكم تخدمون المريض بعلمكم .. لاتضغطون ارواحكم ولاتتراكمون المحاضرات ..

وكلام آخير حبيت اوجهه لكم قبل لا اختم : 

التمريض ليس مجرد شق ابرة او مجرد قياس علامات حيوية .. التمريض اوسع من هالشي .. انك تكون الخط الاول والاقرب للمريض .. انك تشهد حياة طفل جديدة وتكون سبب من بعد الله بانقاذ حالات حرجة ..

انك تكون سبب من بعد الله بانقاذ روح وشفاء مرض .. تكون سبب من بعد الله لما تشوف المريض مبتسم بسبب تعاملك الجميل وكيف اانك المؤثر الاول والأقوى عليه وعلى نفسيته وكيف تحسن حالته وكنت ابرز سبب به من بعد الله ..

التمريض اختصار لقول الرسول عليه الصلاة والسلام ( أحب الناس إلى الله أنفعهم للنّاس )🤍🤍. 

_______________________________

ختاماً : الحمدالله كما ينبغي لجلاله وعظيم سلطانه ، نقلت تجربتي كاملة وذكرت أبرز شيء من ناحية النظام والمواد  ، أتمنى إني نقلتها بطريقة واضحة لكم وبدون ماتكون مملة وطويلة أكثر من اللازم وأن يكون كل ماورد فيها يخدمكم أو يساعدكم ولو بقدرٍ بسيط.. 

 كل التوفيق والتيسير لكم اسأل الله أن يحقق مُناكم وأن تبلغونها بكل ييّسر ورضا ❤️. 

Twitter : @Saraalali_1